Իմ անունն է Օզոն


Բարև: Իմ անունն Օզոն է: Շերտ Օզոնային: Այսօր իմ պաշտպանության միջազգային օրն է:

Կցանկանայի ներկայանալ նրանց, ովքեր ինձ չեն ճանաչում, և հիշեցնել իմ մասին նրանց, ովքեր մոռացել են իմ գոյության մասին:

Ես բնական գազ եմ, ինձ կարող եք գտնել մթնոլորտի երկու շերտերում` տրոպոսֆերայում և ստրատոսֆերայում: Ես կլանում եմ Երկրի մակերեսին ընկնող վնասակար ուլտրամանուշակագույն ճառագայթների 97-99%-ը` պաշտպանելով Երկիր մոլորակը արևի վնասակար ազդեցությունից` ի դեպ, այդ կերպ ձեզ նույնպես պաշտպանելով…

Մարդկային էակների հետ ես շատ նման գծեր ունեմ, հատկապես մարդկային այն տեսակի հետ, ում կյանքի առաքելությունը մերձավորին վտանգից իր իսկ վահանով պաշտպանելն է:

Վատ նորություն ունեմ սակայն: Ես քայքայվում եմ… Ես քայքայվում եմ մարդու կողմից ստեղծված քիմիկական նյութերով` քլորոֆլորոկարբոններով (CFCs):

Իսկ ինչպե՞ս սկսվեց այս ամենը:

Ես պաշտպանում էի իմ կապուտաչյա Երկիր մոլորակը դարեր շարունակ: 1920 թ. ստեղծվեցին քիմիկական նյութերը (CFCs), որոնք սկսեցին օգտագործվել սառնարանների, օդափոխիչների, կրակմարիչների, հեղուկացիրների, քիմիական տարբեր լուծվող նյութերի մեջ: Այնուհետ գիտնականները հայտնաբերեցին, որ դրանք, ինչպես նաև մեքենաների և արդյունաբերական արտանետումները կարող են տրոպոսֆերայից ներթափանցել դեպի վերին մթնոլորտային շերտ` ստրատոսֆերա: Այնտեղ բոլոր այս նյութերը կարող են տարիներ շարունակ արտադրել ինձ ոչնչացնող քլորինի և բրոմի մոլեկուլներ: :(

Նկատու՞մ եք նմանությունները: Ամենայն հավանականությամբ ձեր բոլորի կյանքում նույնպես որոշ բացասական հանգամանքներ կամ մարդիկ տարիներ շարունակ քայքայել են ձեզ, մինչև դուք չեք տվել հակահարված: Ես էլ ունեմ մարդկությանը պատասխան տալու իմ ձևերը` կլիմայական փոփոխություն, գլոբալ տաքացում, երաշտ: Տեսնու՞մ եք, մարդկանց նման ես էլ կարող եմ լինել և’ չար և’ բարի….

Այնուամենայնիվ, մի լավ լուր էլ ունեմ: Ինչպես մարդկային հոգին և մարմինն ունի ծանր վնասվածքներից ինքնավերականգնվելու հատկություն, այնպես էլ ես ի վիճակի եմ ինքնաբուժվել, վերականգնվել մարդու պատճառած վնասներից: Չնայած, որ դա կարող է հարյուրավոր, եթե ոչ հազարավոր տարիներ պահանջել: Ինչպես ձեր բոլորի կյանքում, այնպես էլ բնության մեջ, կազդուրման արագությունը վնասվածքի չափից է կախված: Կենսաբանական տեսակները կարող են վերակագնվել մի քանի տասնամյակների ընթացքում, ես` մեկ հարյուրամյակի, հին անտառները` մի քանի հարյուրամյակների, իսկ ռադիոակտիվ թափոնների սառեցումը` տասնյակ հազար տարիներ է պահանջում:

Կարևորն, այնուամենայնիվ, այն է, որ ես չեմ կարող կազդուրվել մինչդեռ դուք ինձ նոր վնասվածքներ

եք պատճառում: Ինձ «մի փոքր» հանգիստ տվեք, որպեսզի կարողանամ բուժվել:

Ես շնորհակալ եմ, որ երկրի վրա նաև ինձ պաշտպանողներ կան: Օրինակ` Մոնրեալի Արձանագրությունը (միջազգային պայմանագրերի մի շարք` օզոնը քայքայող նյութերի արտադրման և օգտագործման կասեցման մասին), որն ուժի մեջ մտավ 1989 թ.: Այս պահին 160 երկիր ստորագրել է արձանգրությունը: Իսկ 1979 թ. շատ երկրներ արգելեցին CFCs պարունակող նյութերի արտադրությունը: Սա մեծ քայլ էր խնդիրը լուծելու ճանապարհին:

Այո, մենք նման ենք իրար, և մեկմեկու անհրաժեշտ ենք:

Ինչպես մարդը պաշտպանված է արտաքին ազդեցություններից պաշտպանող աուրայով, այնպես էլ ես պաշտպանում եմ երկիր մոլորակը` կոսմիկական ճառագայթումներից: Եվ ինչպես անառողջ մտածելակերպն ու բացասական էներգիան քայքայում են մարդկային աուրան, այնպես էլ վնասակար նյութերը կարող են ինձ`օզոնային շերտիս վնասել:

Ես կարող եմ պաշտպանել կյանքը երկրի վրա կամ վնասել այն, ձեր ապրելակերպն է որոշում իմ ազդեցությունը:

Այսօր իմ տոնն է: Եվ այսօր ես ուզում եմ բարի լինել:

«Օզոնային հաղորդագրությունը» փոխանցեց`

Գայա Սարգսյանը