ՀՀ ՆԱԽԱԳԱՀՆ ԸՆԴՈՒՆԵԼ Է ԱՎՍՏՐԻԱՅԻ ՍԴ ՊԱՏՎԻՐԱԿՈՒԹՅԱՆԸ

ՀՀ նախագահ Սերժ Սարգսյանը նոյեմբերի 6-ին ընդունել է Ավստրիայի սահմանադրական դատարանի պատվիրակության անդամներին՝ Ավստրիայի ՍԴ նախագահ Գերհարդ Հոլզինգերի գլխավորությամբ, հայտնում են ՀՀ նախագահի աշխատակազմի մամլո ծառայությունից:

ՀՀ նախագահը ողջունել է պատվիրակության անդամներին մեր երկրում և ընդգծել, որ նման բարձրաստիճան այցելությունները հնարավորություն են ընձեռնում համակողմանիորեն քննարկելու երկրների արդարադատության համակարգերի արդի խնդիրները, դրանց հաղթահարման հնարավորություններն ու ոլորտի ձեռքբերումները, ինչպես նաև փորձի փոխանակում կատարելու: Սերժ Սարգսյանը կարևորել է Ավստրիայի հետ տարբեր ոլորտներում համագործակցության հետագա խորացումն ու ընդլայնումը, այդ թվում՝ արդարադատության բնագավառում, նկատի առնելով, որ հատկապես այդ բնագավառում Ավստրիան բավականին մեծ ճանապարհ է անցել և կուտակած հարուստ փորձով կարող է օգտակար լինել: Նախագահի հավաստմամբ, Հայաստանը դատաիրավական համակարգում բարեփոխումներ իրականացնելու գործում սերտ համագործակցում է նաև եվրոպական գործընկերների հետ:

Գերհարդ Հոլզինգերը նշել է, որ Ավստրիայի Սահմանադրական դատարանը մեծ կարևորություն է տալիս Եվրոպայի մյուս պետությունների սահմանադրական դատարանների հետ կապերին և ուրախ է Հայաստանի Սահմանադրական դատարանի գործընկերների հետ սերտ և արդյունավետ համագործակցության նման հնարավորության համար: Հանդիպման ժամանակ նա ներկայացրել է նաև Ավստրիայի Սահմանադրական դատարանի դերն ու նշանակությունը երկրի արդարադատության համակարգում:

07.11.2013