Ընթացիկ ծրագրեր

ԵՐԻՏԱՍԱՐԴՈՒԹՅԱՆ ՀԱՐԹԱԿ” ԾՐԱԳԻՐ

“Երիտասարդության հարթակ” ծրագիրը թրեյնինգ-քննարկումների շարք է երիտասարդ մասնագետների (քաղաքագետների, միջազգայնագետների, տնտեսագետների, լրագրողների) համար: Սա յուրահատուկ հարթակ է, որտեղ երիտասարդները ոլորտային մասնագետների հետ միասին քննարկում են ՀՀ արտաքին քաղաքականությանն առնչվող արդի և կարևոր խնդիրները, գիտելիքներ ստանում հարևան երկրների, ՀՀ արտաքին քաղաքականության գերակայություն հանդիսացող հարցերի, միջազգային գործընթացների մասին: Այս ամենը զուգակցվում է թիմային աշխատանքով, սեփական կարծիքի արտահայտմամբ ու  հին խնդիրներին նոր լուծումներ առաջարկելով:

Ծրագրի մասնակիցները, շաբաթը մեկ անգամ հանդիպելով, հնարավորություն են ստանում համապատասխան պետական մարմինների ներկայացուցիչների, փորձագետների, վերլուծաբանների, ՀՀ առաջատար բուհերի դասախոսների հետ քննարկել առավել արդիական և կարևոր հարցեր: Ծրագրի ընթացքում հատուկ տեղ է հատկացվում թիմային աշխատանքներին և անհատական հետազոտություններին, քննարկումներին, բանավեճերին և դերային խաղերին: Այսպիսով, մասնակիցներին տրամադրվում է հարթակ ոչ միայն լսելու, այլև սեփական վերլուծություններով հանդես գալու համար:

“Երիտասարդության հարթակ”-ում մշտապես ուշադրության կենտրոնում է Ղարաբաղյան հակամարտության կարգավորման գործընթացը, ԼՂՀ կայացումն ու զարգացումը, ՀՀ ինտեգրացիոն գործընթացները, հարաբերություններն ուժային կենտրոնների և հարևան երկրների հետ: Բացի այդ, հանդիպումների ընթացքում հատուկ ժամանակ է  հատկացվում  ընթացիկ միջազգային առավել արդիական և կարևոր հարցերի քննարկմանը: Կարևորվում է առկա խնդիրների համար նորարարական և իրական լուծումների մշակումը:

Աշխատանքը երիտասարդների հետ մշտապես եղել է “Եվրոպական ինտեգրացիա” ՀԿ-ի գերակայությունների շարքում, և կազմակերպության կողմից տարեց տարի իրականացվել են երիտասարդության ներգրավմամբ բազմաթիվ ծրագրեր: “Երիտասարդության հարթակ” ծրագիրն իրականացվում է բացառապես “Եվրոպական ինտեգրացիա” ՀԿ-ի ջանքերով, կազմակերպության անդամների կամավորության և էնտուզիազմի շնորհիվ:

Հանդիպումների լուսանկարները

“ԹՈՒՐՔԻԱ. ՀԱՅԱՑՔ ՆԵՐՍԻՑ” ԾՐԱԳԻՐ

 

Մեծ եղեռնը վերապրածների թվում կան մարդիկ, ում կյանքը փրկվել է թուրք հարևանի, ընկերոջ կամ անծանոթի կողմից«Եվրոպական ինտեգրացիա» հասարակական կազմակերպությունն ԱՄՆ պետքարտուղարության աջակցությամբ իրականացրել է  (2015թ.-ի նոյեմբերից 2017թ.-ի մայիս) «Թուրքիա. հայացք ներսից» ծրագիրը, որի նպատակն է նպաստ բերել հայ և թուրք ժողովուրդների միջև երկխոսության զարգացմանն ու փոխադարձ վստահության կառուցմանը: Այս ծրագիրը հիմնված է 2014թ.-ին Միացյալ Թագավորության արտաքին և համագործակցության երկրների նախարարության օժանդակությամբ մեր կողմից իրականացված ծրագրի վրա, որի արդյունքում պատրաստվեց «100 տարի… իրական պատմություններ» գիրքը: Էլեկտրոնային տարբերակին կարելի է ծանոթանալ հետևյալ հղմամբ:

Թուրքիայում ծրագրի մեր գործընկերներն են «Հայ Մշակոյթի և Զօրակցութեան Միութիւնը» (համակարգող՝ Արիս Նալջը), ինչպես նաև Ալին Օզինյան-Ոսկանյանը:

Ծրագրով նախատեսված էր էլեկտրոնային  գրքի պատրաստում, որտեղ ներկայացված են հայերին փրկած թուրքերի/քրդերի ժառանգների 15 պատմություն, ներկայումս Թուրքիայում ապրող հայերի 15 պատմություն, և 10 հարցազրույց փրկվածների (թուրքերի/ քրդերի կողմից փրկված հայեր) և հայերին փրկած թուրքերի/քրդերի ժառանգների հետ:

Պատմություններն իրական են՝ սղագրված ճիշտ այնպես, ինչպես պատմել են մեր թիմին, առանց բովանդակային խմբագրման: Պատմությունները բանավոր վերարտադրել են Մեծ եղեռնը վերապրածների և հայերին փրկողների ժառանգները, հարազատները, մտերիմները: Յուրաքանչյուր հերոս կիսվել է նրանով, ինչ ականատեսները պատմել են այդ ժամանակվա իրադարձությունների մասին: Թուրքիայում ներկայումս բնակվող հայերի պատմությունները, ներկայացվող հարցազրույցները ներառում են նաև հերոսների հայացքը Թուրքիայի ներսում ընթացող փոխակերպումների, Թուրքիայի և Հայաստանի միջև հարաբերությունների ներկայիս վիճակի հետ կապված:

«Թուրքիա. հայացք ներսից» գրքի էլեկտրոնային տարբերակը հրապարակվել է հայերեն, թուրքերեն, անգլերեն լեզուներով և հասանելի է անվճար: Այն նախատեսված է ընթերցող լայն շրջանակների համար:

 

Գրքում զետեղված նյութերը, կարծիքներն ու եզրակացությունները ներկայացնում են իրադարձությունների մասնակիցների և պատմությունները վերարտադրող անձանց տեսակետը և չեն արտացոլում ԱՄՆ կառավարության դիրքորոշումը: